Sasapit na naman ang gabi
Hindi ko maaninag ang liwanag
Dahil sa mga luhang pinigil ko buong umaga
At sa tuwing ako’y pipikit,
Ay nakikita ko ang iyong mukha,
Katawan ko’y lumalakbay
Sa mga panahong nakikita kitang masaya,
Sa mga panahong ikaw ay lumuha at natakot.
Sa mga gabing binigo tayo ng mga bulalakaw.
Sa mga umagang pinag-uusapan natin ang magagandang bulaklak.
Sa mga umagang ninais nating maging pulang rosas.
Umaagos ang mga luha ng pag-ibig, lungkot at pangungulila
Hatinggabi nang makakatulog ang pagod na mga mata
Madaling araw nang matuyo ang mga luha
Hinihintay ka sa panaginip,
At gigisingin ulit ng katotohang wala ka na.
Gising…
