Hindi ba’t sabi mong pulutin ko
ang mga basag na piraso
ng puso kong winasak ng kung sinu sino?
Pupulutin,
Pagtatagpi-tagpiin,
Bubuuin.
Hindi ba’t sabi mo ingatan ko ang pusong ito,
dahil isang araw
may kukuha at mag-aalaga nito?
Kukuhanin,
Kukupkupin,
Mamahalin.
Hindi ba’t pinulot,
pinagtagpi
at binuo ko naman?
At hindi na ata namalayan,
Nakuha mo,
nakupkop mo
pero minahal?
Hindi siguro.
Hindi ka kasi sigurado.
Kaya heto, nagpupulot ulit ako
ng mga basag na piraso
ng puso kong winasak
ng kung sinu sino.