Nag-aaral pa tayo nun sa kolehiyo nung sobrang nangungulit ka mapa-oo lang ako
Sabi mo mahal mo ako
Ayun, naniwala naman ako
Sino bang hi-hindi sa panunuyo mo?
Nagtapos muna ako ng kolehiyo bago kita sinagot,
Ang pangarap ko, unti-unti kong inabot
Kahit nag-aaral ka pa, di ka nakalimot
Una pa lang, ayoko talaga sa’yo hanggang sa puso ko ay lumambot.
“Mahal” yan ang gusto mong tawagan natin
Tinanong mo pa ako kung ayos lang bang yan ang gamitin
Nung una, nag-alangan akong gawin
Hanggang sa puso ko’y mayroon na itong diin.
Maayos ang lahat, naging masaya tayo
Nagsimula na nga ang pag-ibig ko sa’yo
Parang araw-araw, gusto ko ikaw kasama ko
At madalas ko ng nasambit ang mga salitang “mahal ko”.
Sa una, mababaw lang ating mga pinagtalunan,
Konting “sorry mahal ko”, tampo ay wala ng paglagyan
Para bang mga batang nag-aasaran
Pero lubos na nagmamahalan.
Inabot tayo ng isa, dalawa, tatlo, apat na taon
Puno ng pagmamahal ang bawat pagkakataon
Sa wagas na pag-ibig natin, saksi ang Panginoon
Kaya marami tayong nalagpasan na hamon.
Away dito, away doon
Naghihiwalay na lang taon-taon
Ngunit mga pinagsamaha’y di kayang basta itapon
Kaya patuloy na nakipagsalaran sa dagat na malakas ang alon.
Subalit dumating tayo sa hangganan
Bawat puso’y sobrang nasaktan
Pagkat ikaw ay aking itinuring ng tahanan
Kaya ako’y patuloy na lumaban.
Sabi mo ayaw mo na
Kaya hindi na ako umasa
Na tayo’y magkakabalikan pa
Tinanggap na lang kung ano ang tadhana.
Ngunit may isang mabuting kaibigan
Na sa aki’y nakipag-ugnayan
Sa kanya’y aking nalaman
Na nais mo sa aki’y makipagbalikan.
Tumalon ang puso ko sa tuwa
Kahit anung nangyari, ako’y sa iyo’ y walang sawa
Kaya walang ibang ginawa
Kundi ika’y hintaying sa aki’y magpakita
Ilang beses nga tayong nagkita na parang magkasintahan
Sa bawat sandali’y ramdam na iba na ang iyong pagkakakilanlan
Ni hindi ko na alam kung ako pa’y iyong kailangan
Sa bagong buhay mong puno na yata ng kasiyahan
Naguluhan ka, naguluhan ako
Ang ginagawa natin tila ba’y isa na lang laro
Ang tadhana’y para bang nagbibiro
Na pwedeng sa susunod na araw, may isang tuluyang mabibigo.
At dumating na nga ang malakas na bagyo,
Hindi ka pa muling nakasampa sa barko
Subalit napakagulo ng salitang “tayo”
Hanggang sa masasakit na nga ang mga salitang nagmula sa iyo.
Oo, Sinabi Kong Okay Lang Pero Di ‘ko Sinabing Hindi Masakit
Ako’ y iniwan na puno ng bakit
Para bang kaligayaha’y sa akin ay ipinagkait
Isip at puso’y napuno ng galit
Pagmamahal ay napalitan ng sobrang sakit.
Pero heto ako ngayon,
Masiglang bumabangon
Handa sa kahit na anumang hamon
Sama ng loob ng kahapon, nais ko ng ibaon.
Kasabay nito ay ang aking pagmo-move on
Sa taong sobrang minahal ko sa loob ng anim na taon.
Salamat, mahal ko, sa huling pagkakataon
Sana masaya ka sa kung anung meron ka ngayon.
Alam ko minahal mo rin ako nang sobra
Ngunit lahat ng sobra ay nakasasama
Kaya siguro di tayo ang itinadhana
Pero, salamat sa Ama sapagkat ika’y aking nakilala.
Tamis ng unang pag-ibig ay aking naramdaman,
Ngunit ngayo’y kailangan ng magpaalam
Sa masasayang alaala na iyong iniwan
At sa maraming taon na ating pinagsamahan at sa ati’y ipinahiram.
Aking unang pag-ibig, sayo’y ito na ang aking huling paalam.
