UNA AT HULI
Unang iniisip pagmulat ng mga mata
Kumain ka na ba? O gising ka na ba?
Oo nga may pasok ka, baka nga
Bumiyahe ka na.
Unang iniisip kapag nakikita ko sila
Sila na magkahawak ng kamay,
Sila, sa isa’t isa’y kumakaway
Ako, na mag-isa, walang kasabay
Unang pinangarap ko,
Pagkatapos ng mahabang panahon
na pinahinga ang puso at binaon
sinara sa lahat upang makabangon
Unang naaalala ko sa bawat musika
Na maririnig ng aking tenga
Dinaramdam ang bawat himig
Umaaasang ito sana ay iyong tinig
Unang mukha na pumapasok sa aking isip
Sa pagsara ng mga mata kong takot sa ihip
Ng hangin at baka malanghap ko
Ang amoy ng damit mo na nakasabit
sa aparador ko
Hindi ka pa nasiyahan
Hindi mo lang inumpisahan
Sinakop mo na pati
Ang bawat katapusan
Huling sumasagi sa aking isipan
Bago ipahinga ang aking katawan
Sa buong araw na paguran
Sa pinili kong maging tahanan
Huling pangalang ninanais ko
Na sana man lang kahit huling pagbati
Ay matanggap ko mula sayo
Na sana man lang mabasa ang pangalan mo
Oo, sa pagsapit ng gabi,
Sa huling minuto ng araw na ‘to
Umaaasa ako kahit alam kong malabo
Na maaalala mong naghihintay ako
Sa huling pagkatataon, naghintay ako
Sa mensahe mong baka makapagbago pa
Ng isipan mong gulong gulo
magulo ba talaga? Ay hindi pala
Dahil ang naaalala ko
Mula sa huling mensahe mo
Buong buo na ang desisyon mo
Ayaw mo na sa piling ko
Ayaw mo na sa kalokohang ito,
Ayaw mo ng kalabanin ang tadhana
Dahil sino ba nga naman ang magtatangka
Na sumubok pa kahit imposible na
Kaya sa aking huling talata
Aking ipapanata na hindi na ako aasa
Na bumalik ka pa at ako ay isalba
Sapagkat tapos ang ating maikling istorya
