Gusto kita

Alam ko namang alam mo na

Pero ang di ko alam

Ay kung pareho ba

Pareho ba?

Pareho ba nating hinihintay ang susunod na araw na tayo’y magkikita? 

Pareho bang nagbibilang ng buwan kung kailan muling magkakasama?

Pareho bang nagnanais na makausap kahit siguro ilang minuto lang?

Pareho bang ang simpleng presensya lamang ay sapat na para mabuo ang araw?

Siguro nga masyado pang mababaw yung mga pwedeng pagbasehan

Pero sa totoo lang ‘di ko rin maintindihan

Bakit ganito na lang kalalim ang nararamdaman

Bakit simpleng tingin mo lang tumatahimik ang lahat

Sa totoo lang desperada mang pakinggan 

Gustong-gusto ko nang malaman

Kung ano ba ang iyong nararamdaman

Posible ba? 

Posible bang hindi lang ako ang interesado kung anong nangyari sa iyong araw

Masaya ka ba nitong mga nakaraang buwan? 

Maayos ba ang iyong kalagayan? 

Sana hindi ka nasasaktan 

Ang dramang pakinggan 

Siguro nga dahil na rin sa ulan

Masyado akong nadadala ng nararamdaman

Minsan gusto ko ring pigilan kasi ayaw ko rin namang masaktan

Pero kung pagiging totoo lang ang usapan

Gusto ko ring iyong malaman

Na sa dami ng nakakasalamuha sa bawat araw

Ikaw lang ang gustong mahagkan

Mga kantahan mo lang ang gustong pakinggan

Ngiti mo lang ang gustong masulyapan

Presensya mo lang ang gustong maramdaman 

Mata mo lang ang gustong matitigan 

Kaya lang kahit gaano ko gustong iparamdam

Wala akong magagawa kundi maghintay lang

Gaano pa kaya katagal

Yung araw na malalaman ko kung ano ba talaga ang iyong nararamdaman

Minsan pinagdarasal ko na sana maging akin ka

Oo nakakatawa pero ewan ko ba

Mas madalas pinagdarasal ko na sana okay ka 

Na masaya ka

Na hindi ka nasasaktan

Na may kaibigan kang laging maiiyakan

At makukwentuhan kung anong nangyari sa iyong araw 

At kung may nagugustuhan ka na ba, sana gusto ka rin niya

Ang impokrita pakinggan pero di ko rin alam

Basta ayaw ko ng ideya na malungkot ka

Ang gusto ko maging masaya ka

Ayun lang okay na kahit di ako kasama

Kung sakali ngang may iba ka nang nagugustuhan

Syempre nakakapanghinayang

Pero wala eh ganun talaga 

Di ko naman hawak ang iyong kapalaran

Pero iniisip ko na kung sa susunod kaya nating pagkikita

Ganito pa rin kaya ang nararamdaman?

O baka pareho na? 

Pareho na tayong may iba?