Disclaimer: The views and opinions expressed in this article are those of the authors and do not necessarily reflect the official position of Boiling Waters PH.
Paano ko ba ito sisimulan
Kung wala namang kasiguraduhan
Kung hanggang saan
While you are busy reading this article, try mo rin makinig sa episode namin:
Ang nararamdaman ko sayo’y hanggang saan
Ang pagsusumamo ko’y hanggang saan
Ang pangungulila sayo’y hanggang saan
Hindi mawari bakit di ka magawang bitawan
Marahil siguro hindi pa rin ako nalilinawan
Kung paano natigil ang matamis na pagtitinginan
Sa iyong paglisan
Ni wala kang iniwan na kasagutan
Kaya heto ako ngayon
Punong puno ng katanungan
Ang lahat ay nag-iba
Mula nang ika’y mawala
Ang puso ko na
Dati’y pilit kumakawala
Dahil sa sobrang saya
Ay unti unting tumigas
Nanigas na parang yelo
Dahil sa biglang panlalamig mo
Ang dating kislap ng mga mata
Sa tuwing ika’y nakikita
Ay napaltan ng luha
Nang muli tayong magkita
At parang wala ka lang nakita
Marahil siguro’y may iba ka na ngang nakita
Kaya pakikitungo mo’y tuluyan na ring nag-iba
O baka hindi
Baka sadyang lumabo lang talaga ang mga mata mo
Kasabay ng panlalabo ng nararamdaman mo
Bakit binitawan mo ako
Kung kailan pang tuluyan na akong nahulog sa’yo
Bakit iniwan mo ako
Kung kailan pang handa na akong maging katuwang mo
Bakit nilayuan mo ako
Kung kailan pang tuluyan na ‘kong napalapit sa’yo
Teka nga bakit ba apektadong apektado ako
Eh hindi naman naging tayo
Dahil bago pa man magkaroon ng tayo,
Sumuko ka na sa iyong pagsuyo
Naiwan akong puno ng katanungan,
Dahil umalis kang bigla ng walang iniwang dahilan
Hindi ko naman tinuruan ang puso na ika’y maibigan
Kaya sana makalimot rin ito nang hindi ko tinuturuan
Ngunit paano kita kakalimutan
Kung sayo ko lang naman ito naramdaman
Hindi ko sigurado,
Kung muli pang titibok ang puso ko,
Gaya ng pagtibok nito sayo
Pero ito lang ang alam kong sigurado
Kahit kailan hinding hindi ka mawawalan ng puwang rito
Dahil binasag mo man ako,
Pag-ibig ko sayo’y mananatiling buo
Ang tulang ito ay para lamang sa isang tao na unang minahal ko at patuloy pa ‘ring minamahal ko. Alam kong hindi mo mababasa ito pero gusto ko lang iparating sa mundo kung gaano kahalaga ang isang taong katulad mo, kahit na nasaktan mo’ko, hindi ka kailanman nawala sa mga panalangin ko, mula noon hanggang ngayon, ang tanging hangad ko ay ang makakapagpapasaya sayo. Kaya kung ang paglayo ko ang makakapagpasaya sayo, heto na gagawin ko.
