Ballpen at papel ang karamay
Sa aking silid na tila may lamay
Ulan at kidlat ay pilit sumabay
Sa damdaming nais mag-ingay
Nalito’t napaisip ano ba talaga
Tunay ba na sa’yo ako’y may halaga
Mga pangyayari ay pilit inalala
Kung totoo ba ang aking mga akala
Taon ang lumipas bago namulat
Sa mga kuro-kurong aking naisulat
Ang pagtingin na may pag-aalinlangan
Ay matagal na pa lang nabalingan
Makalipas ang anim na taon
Umayon sa akin ang panahon
Ngayon, handa na akong tumalon
Sa dagat na punong-puno ng alon
